憂社會三大問題 李嘉誠無心睡眠

【明報專訊】身為香港首富的超人李嘉誠，都有瞓唔着嘅時候，佢唔係因為怕有賊偷佢錢瞓唔着，而係因為社會有3個現象令佢好擔心，搞到佢瞓唔着。佢噚日用「無心睡眠」為題，喺佢一手湊大嘅汕頭大學畢業禮上，分享呢3個令佢擔心嘅現象，包括全球化令機會失衡、國家資源局限成為未來發展嘅難題，同埋人與人之間欠缺互信，最後令社會失去理性嘅問題。


怕全球化令社會失衡

李超人話，佢已經85歲，各種個人得失早被風風雨雨冲淡，無咩好憂心。不過，佢擔心喺全球化、知識經濟嘅時代，各人智商、能力同努力程度唔一樣 ，最後有可能失衡成為「新常態」。而國家資源局限成為未來發展嘅難題，亦令佢好擔心。


佢認為，解決上面兩個問題，政府要有靈活方略，處理價值世界同實際世界間嘅微妙關係，特別在再分配嘅調節機制，唔好畀「貧富懸殊嘅憤怒」同「高福利負擔」呢兩種現象，持續令社會停滯和不安；政府一定要深切推行教育改革。至於「人與人之間欠缺互信」問題，超人話信任可以凝聚理性社會，但無咗互信，大家就會對一切存疑，當認為公平公正公義被腐蝕，政經生態都會走向惡性循環嘅大滑坡。超人無畀具體答案，但對住一班大學畢業生，就叫佢哋作出承擔。