盛智文扮潛水 「鯊魚」相伴

【明報專訊】海洋公園今日重開鯊魚館，即將卸任公園主席嘅盛智文（Allan Zeman）繼續鬼馬，身穿潛水衣、頭披兩條海草，參加噚日嘅鯊魚館開幕典禮，扮晒啱啱同鯊魚潛水咁款，果然無令一眾行家失望。Allan話，佢尊重政府唔畀佢留低嘅決定，仲拍心口話唔會過檔其他樂園，因為唔想傷害海洋公園同香港人感情，認真識做﹗


續做顧問拒過檔

Allan爆料，一直有唔少樂園向佢招手，但佢喺海洋公園做咗11年主席，呢度就好似佢嘅BB一樣，佢唔捨得做傷害海洋公園嘅事。


Allan又預告，未來2星期內會開最後一次董事局會議，新任主席孔令成講明會邀請佢做榮譽顧問，佢應承會繼續盡力幫海洋公園，好似興建緊嘅水上樂園、下年初開嘅樹熊館，同埋即將動工嘅新酒店等，都會落力畀意見咁話。