阿蘇咬人高永文話多菌

【明報專訊】曾講過支持西班牙、意大利同英格蘭嘅食物及衛生局長高永文，已被喻為「金鐘Lulu」，做咗政界「燈神」，捧邊隊衰邊隊，但佢噚日就叫大家唔使擔心，因為佢捧嘅幾隊已經出晒局，佢唔會再支持任何一隊。佢解釋因為平日工作嚴肅，醫學界亦都係一個團隊咁工作，所以放工後睇波，反而鍾意睇啲無乜紀律但有風格嘅球隊。

前晚烏拉圭球員蘇亞雷斯（阿蘇）比賽途中開口咬人，令意大利基亞連尼嘅香肩留下幾粒牙印，噚日頓成熱話，高永文就用醫學角度評論，話不論係人定動物，其實咬人都係一個幾危險嘅動作，因為會有好多細菌，傷口應該要消毒，仲話如果畀人咬，應該立即去急症室"口忝"。

陳克勤「送面罩」惹猜想

民建聯陳克勤都係球迷，噚日佢喺facebook上載咗面罩相，講笑話應該送畀蘇亞雷斯戴，以防佢再咬人；但作家健吾就轉載，質疑點解克勤屋企會有呢啲咁「重口味」嘅面罩，但克勤話張圖只係喺網上搵，反擊對方真係「作家」。

政制及內地事務局長譚志源就話，由細到大都係捧巴西隊，原來佢細細個時，爸爸帶過佢去元朗嘅戲院睇有關巴西足球嘅片，自始愛上巴西隊，不過今次世界盃佢就無乜點睇喇，原來佢同歌手蔡卓妍一樣，都係因為免費電視唔係場場播，所以無得追睇。