高永文都係燈神

【明報專訊】世界盃熱潮勢不可擋，噚晚香港公共醫療醫生協會（PDA）搞晚宴，成晚都講波，食物及衛生局長高永文最慘，捧3隊但最少兩隊衰咗——西班牙同英格蘭已經提早「畢業」，意大利表現亦唔算標青，事到如今，高局長唯有話佢唔介意做波壇「燈神Lulu」（董嘉儀）。


高永文幾乎貼邊隊輸邊隊，有記者行家封佢做「金鐘Lulu」，但原來佢唔知邊個係燈神Lulu㗎，一番解釋之後，佢都係堅持自己嘅愛隊，願意做燈神咁話，下一場佢話對巴西尼馬有好感，大家識做啦！

話德國隊「似機械人無靈魂」

高永文雖然希望醫學界好似足球隊咁團結，但佢就話好憎擅長團隊技術嘅德國隊，話佢哋「似機械人，無靈魂」，仲話佢哋連茅波都高度訓練。咁啱同場嘅威院前院長馮康正正撐德國，不過馮康話自己喺房睇波，電視細，球員個頭好細，唔知邊個踢緊咁話。


梁智仁：估唔到醫生咁多時間睇波

大家講波講到咁開心，醫管局主席梁智仁都講埋一份，但佢竟然「攝」一句話估唔到醫生咁多時間睇波，睇嚟醫生要爭取減少醫生工時，真係逃唔過佢法眼。