梁美芬赴京唔開立會：了解白皮書重要啲

【明報專訊】人民力量立法會議員家每次大會都係咁點人數，建制派少啲議員出席嘅話，隨時流會，不過建制派議員梁美芬一於少理，噚晚已經搭咗飛機去北京，諗住聽日先返香港。點解走得咁急？原來佢獲邀出席全國港澳研究會搞嘅一國兩制白皮書座談會，擔任主講嘉賓，佢同Emily講話自己衡量過，覺得都係了解吓有關白皮書嘅睇法重要啲。


任座談會主講嘉賓

全國港澳研究會上周五喺香港搞咗白皮書座談會之後，今日會喺北京大學法學院凱原樓學術報告廳搞第二場白皮書座談會，由全國港澳研究會副會長饒戈平教授、中國人民大學台港澳研究中心主任齊鵬飛教授負責主持，主講嘉賓有梁美芬，同一眾內地教授如北大法學院強世功、清華大學法學院林來梵等。


梁美芬話個講題好闊，只知道係要講一國兩制。至於點解唔去開立法會大會，梁美芬話對方請主講嘉賓時，唔會遷就自己係立法會議員，佢衡量過後，覺得呢排白皮書較熱，都係上去了解一下內地學者睇法好啲。