數碼通搞醫療App

【明報專訊】數碼通（0315）舊年賣手機賣得差，業績麻麻地兼減派息，搞到個股價碌咗唔少落嚟。「窮則變」總裁黎大鈞（圖）噚日出嚟話，集團搞咗間做保健生意嘅子公司Connected Health，仲出咗個免費App叫「健易達」。黎大鈞話，香港好多人唔多健康，若果用呢個App，每個月再科水168蚊，簽12個月約，就可以更全面咁監測健康狀况，仲保留埋啲記錄添。


黎大鈞關心記者健康

為配合呢個新服務，嚟緊數碼通嘅門市會賣埋啲血壓計、血糖機等等，十足十百老匯賣藥油咁，果然有生意頭腦，唔通連醫療嗰範都想撈埋？黎大鈞就急急澄清話唔係搞醫療，而係搞健康生活，想鼓勵啲人行多兩步、食少啲高卡路里嘅嘢。佢仲似乎好關心記者健康添，同在場記者講：「你唔裝個App，咪好易有Metabolic Syndrome（代謝綜合症）囉」。嗯，小琴多謝晒黎生關心喎。


[小琴密語 email: piano@mingpao.com]