偲嫣絕食時數計多咗

【明報專訊】正義聯盟召集人李偲嫣「絕食抗暴力」，若今日下晝唔放棄，就即將可以踏入「絕食72小時」，不過Emily噚日喺網上就見到李偲嫣喺帳幕前拎住張相，話自己已經絕食咗77小時，Emily左計右計，點計都計唔到77個鐘，皆因李偲嫣周日晏晝1點半先開始絕食，唔通佢喺屋企已經事先絕食咗幾個鐘？

為咗求證，本報特登打電話畀李偲嫣，但就只係聯絡到正義聯盟另一名蔡姓成員，佢確認偲嫣周日下午1點先開始絕食，但就話以為「周日、一、二」已經係3日、72小時，所以一時混亂寫錯咗。其實周日1點半至周二1點半之間，只有48小時，唔好搞錯，截至噚晚12點，偲嫣絕食咗58.5小時。


精神不佳 「也許不可再起來」

雖然偲嫣絕食時間「少咗」，但仍然有多人探佢，好似新民黨主席葉劉淑儀；日前去政總旁野餐「支持」偲嫣無限期絕食嘅十幾個網民亦有重回舊地，但偲嫣似乎唔多精神，喺帳篷坐喺度都要前後各一把扇，先至夠涼快，又喺facebook發表心聲，話「偲嫣躺下了，也許不可以再起來」。