郭琳廣請記者手下留情

【明報專訊】新任監警會主席郭琳廣噚日同傳媒見面，席間被問到點睇監警會至今都無獨立調查權問題，郭主席就話要交畀政府同立法機關處理，相比前主席翟紹唐講明要加強介入調查，明顯有所對比。郭琳廣話，被動與否好難用三言兩語做判斷，好似前主席喺監警會都做咗5年，自己先啱啱起步，希望大家可以畀啲時間，仲希望Emily同班行家高抬貴手喎。


郭主席話，本來6月底要飛去英國睇愛女中學畢業，都特登改遲機票，希望可以去視察7．1遊行。咁又會唔會陪示威者留守到凌晨？郭主席只係話盡量留耐啲，但第二朝要一早上機，「我都要瞓覺嘅」。


個人修為講錯「維修」

至於曾經做過政協嘅佢，點樣說服公眾能夠持平，佢就話要「睇個人修為……係『維修』」。維修？郭琳廣將「修為」講錯做「維修」，仲笑笑口話「經過今朝可能都要（維修）吓，希望你哋都手下留情，唔好『維修』我」。