居港13年 綠海龜重返大海

【明報專訊】13年前嘅2001年，一隻綠海龜乸游上南丫島深灣產卵，當時監察嘅漁護署人員就收集咗該批龜蛋做人工孵化，其中一隻小海龜嘅殼輕微變形，唔適合放回大海，於是交咗畀海洋公園照顧。轉眼間小海龜已經成長，龜殼有79厘米長，重76.5公斤，有能力出海喇！漁護署於是喺噚日，將佢同另外兩隻綠海龜同1隻玳瑁一齊放歸大海，畀佢哋返番大自然。


植入晶片 追蹤去向

當年小海龜嘅兄弟姐妹早已各散東西，佢哋係咪可以喺茫茫大海遇上，暫時仲係未知數，但漁護署就喺佢身上植入晶片、扣上金屬標誌，仲安裝埋衛星追蹤儀器，追蹤去向，與外國保育機構分享資料，有助各國制訂保育措施。


另外兩隻幼年綠海龜同一隻玳瑁，就喺2012年10月至今年5月期間，由市民和漁護署人員分別喺西貢清水灣第二泳灘、西貢露營灣海灘，以及印洲塘發現，經獸醫檢查後，與成年海龜噚日被運到東南面水域放生。