嶺大校友聯署撐何潔泓

【明報專訊】嶺大學生何潔泓早前因參與在立法會反對新界東北發展嘅抗爭，被警方以參與非法集會罪名拘捕，嶺大學生會署理會長羅冠聰即刻寫咗封公開信畀校長鄭國漢，話何潔泓為弱勢社群抗爭、阻止社會繼續腐敗，體現博雅教育精神，要求校長聲援佢。


嶺大校長：樂意寫求情信

鄭校長就回覆話，深切關注何潔泓被捕，已敦促學生服務中心協助佢，又話嶺大支持言論自由，鼓勵師生以和平理性方式表達意見。佢又透過校方發言人向Emily補充，如有需要，樂意為何潔泓寫求情信。


不過何潔泓唔多收貨，佢話﹕「校長嘅意思即係衝擊立法會唔係和平理性，佢應該要了解學生同大眾點解要咁做，有時衝擊行為都係合理嘅。」但何亦話，嶺大學生事務處已經同佢講，有個校董可以向佢提供法律意見，都會為佢提供其他協助，何潔泓對呢啲支援都讚好。


一班嶺大學生會老鬼喺facebook發起咗「嶺大畢業生聯署：支持何潔泓為公義而抗爭」，仲呼籲聯署者星期五立法會再審議新界東北議案時，去立法會外宣示訴求，至噚日有400幾人簽咗聯署。


鄭校長就回應，對嶺大學生同畢業生就呢件事積極及和平理性地表達意見感到欣慰，但同時希望各人繼續注意安全。