新聞類別
港聞
詳情#
【明報專訊】壹傳媒集團主席黎智英(肥佬黎)不時成為建制團體攻擊對象,噚日佢做港台節目《城市論壇》嘅嘉賓,由傅振中等人成立嘅保衛香港運動、匯賢起動等團體就到場招呼佢。黎智英一到場,台下嘅人隨即起哄,傅振中等人大罵黎智英收美國佬錢、勾結外國勢力。不過,黎智英輸人唔輸陣,對住佢哋舉起雙臂、豎起拇指示威,令台下示威者更激動。黎智英更加話「好高興」見到佢哋,形容話見到啲「屎忽當大腦」嘅人,又直斥傅振中「個樣好醜惡、無恥」。
被批收美國錢 黎斥誹謗
節目期間,黎智英一發言,台下示威者亦唔停口,不時叫佢上遊艇、出公海,傅振中其後質疑佢收美國佬錢,佢嘅傳媒又點樣中立持平?黎智英回應話從來無收過任何人錢,批評對方誹謗,又話即使受打壓,立場都唔會變。台上嘅民建聯常委周浩鼎就拎住早前報道黎智英同美國國防部前副部長伍夫維茲(Paul Wolfowitz)會面嘅雜誌,質疑對方作為傳媒老闆應小心啲交朋友。黎智英反駁,係咪傳媒只能夠同中國認可、友善嘅人做朋友,中國做咩都啱?
留言 (0)