阿里批騰訊 專注抄襲16年

【明報專訊】內地依家成日講雲計算，搞得網絡公司就至低限度都應該要有一舊雲，所以阿里巴巴有「阿里雲」，而騰訊（0700）亦不甘其後，有「騰訊雲」。不過咁，尋日阿里雲就響自己個官方微博度，大插騰訊果舊雲抄襲抄到離晒大譜。


事緣有位微博用戶發帖，話發覺騰訊雲同阿里雲一模一樣，人地用咩手法宣傳佢就用咩手法宣傳，殊不知個帖畀阿里雲轉貼，加把口話騰訊「專注抄襲16年」，仲笑佢哋抄襲之餘又懶做功課，唔單止將阿里雲獨家case原封不動照抄如儀，阿里雲自己官網內容有個錯別字，騰訊雲竟然連個別字都抄埋，大家一齊錯。


講真句，小琴覺得響設計上面真係好難追究有冇抄襲，畢竟大家都係雲，最多咪响舊雲度搞變化，之不過，如果真係抄襲到連人哋個錯處都抄埋，又似乎太過貽笑大方了。


email: piano@mingpao.com

[小琴密語]