的士唔肯去中區

【明報專訊】立法會財委會噚日再開會傾新界東北撥款，村民同示威者繼續到場抗議，有的士司機怕隨時封路，唔肯載客去中區。市民王小姐同Emily講，噚日1點幾由青衣搭的士去中環返工，點知打咗畀8個的士台都無車，決定落街截車，點知的士司機話怕立法會開會引起混亂，最終只肯送佢去九龍站，叫佢再轉搭港鐵去中環。


王小姐話，噚日拎住好多嘢又趕時間，最初被的士拒載覺得好無奈，又會覺得示威者阻住佢，但諗深一層，香港人都係為表達訴求，唔應該因為自己一時唔方便而覺得示威者唔啱。


汽車交通運輸業總工會的士司機分會主任杜燊棠話，噚日部分的士行家擔心立法會外面有衝突，會搞到堵塞道路，所以唔想去中區。


除咗反新界東北令到的士界關注，約30個士業界團體200個會員今日下晝會去警察總部同政府總部請願，要求制止佔中，怕交通混亂，嚴重影響經濟民生，令社會付出沉重代價咁話。