新聞類別
港聞
詳情#
【明報專訊】商務及經濟發展局長蘇錦樑(Greg So)噚日帶埋副局梁敬國、政助陳百里,第一次「齊腳」同傳媒茶敘,局長帶埋太太整嘅芝士蛋糕同行家分享。講到近期好hit、觸及新界原居民丁權題材嘅《竊聽風雲3》,有份睇首映嘅Greg So唔單止激讚扮鄉紳嘅演員「好似」,仲講笑咁話應該拍番套「特區政府版」,Emily就梗係八卦追問想搵邊個演佢自己啦,局長話由細到大都畀人話似一個演員,就係人稱大哥嘅鄧光榮,不過大哥已經過身,就算開拍都演唔到啦。
Greg So本來叫行家估佢似邊個演員,成班行家估咗一輪都無頭緒,有位女行家就估局長似劉青雲,氹到佢笑晒口,最終新聞秘書畀貼士話個演員姓鄧,大家先估到係鄧光榮。
自言似鄧光榮
局長全程同行家談笑風生,講到自由行,佢話坊間建議嘅「一簽N行」方案值得聆聽;相反,連立法會主席曾鈺成都認唔出嘅副局梁敬國,噚日仲係比較寡言,搞到局長都要出聲勸佢開場白講多幾句。
副局梁敬國照舊寡言
咁又係,政助陳百里唔單止係局長前黨友,噚日仲準備埋power point講解咁積極搶鏡,睇嚟梁副局真係要加多把勁啦。
留言 (0)