廣汽新車出鏡《變形金剛4》

【明報專訊】《變形金剛4》噚晚喺香港舉行全球首映，片中唔單止有李冰冰、韓庚等世界盃入邊見唔到嘅中國面孔，仲有廣汽（2238）旗下國產汽車品牌傳祺的3款靚車身影。


廣汽乘用車總經理吳松噚日專程到香港參加《變4》首映禮，佢介紹話，其實今次係《變4》相中傳祺在先，一開始傳祺都奇怪點解會搵佢哋。原來，《變4》製片人當時考慮將影片融入中國元素，而參觀咗舊年年初嘅北美車展後，相中咗傳祺。不過，傳祺響片中戲分究竟有幾多？吳松話呢個得導演Michael Bay知，佢自己都要等到首映時先知。但佢就堅決不肯透露廣汽今次贊助咗幾多錢。


雖然小琴都未睇到變4，但據傳傳祺共有3款車出鏡。其中一款係外觀酷似平治入門級跑車CLA的傳祺概念車E-jet，另兩款係已面市的GS5和GA5。


據講，E-jet將載有片中中方重要角色馳騁於美國街道上，GS5則以中國軍方車隊形象亮相，而GA5就作為李冰冰嘅專屬座駕，響香港上演追逐大戰。


可能由於興頭正高，吳松還透露，根據今年首5個月嘅銷售勢頭，廣汽今年應該可以突破全年銷量11.5萬輛嘅目標，全年突破13萬輛應該唔成問題。


[小琴密語]