田少撤動議 皆大歡喜

【明報專訊】人民力量表明「全面開戰」後，立法會噚日復會，兩名人力議員不停要求點人數，但大部分議員懶理，5次點人數，次次都響鐘超過10分鐘先夠人，結果去到討論自由黨田北俊提出、建議為起公營房屋同基建特別輸入外勞嘅動議時，田少主動收回動議，令會議提早結束。


話人力頻點人數 令議會失效

田少解釋，相信喺勞工界唔支持下，原議案通過機會唔大，加上人力陳志全同陳偉業無限、無聊咁點人數，根本無建設性，令議會辯論失去作用，變成只讓兩人表達政治立場。面對點人數鐘聲纏擾，議員提早「放學」當然皆大歡喜，好似民建聯譚耀宗就話田北俊決定明智。


自由黨近日亦動作多多，該黨一直鮮明反對同性戀，近日向所有議員送上2005年出版嘅《平權？霸權？審視同性戀議題》一書，書中寫明由明光社供稿，相信立場係點，大家好清楚。呢本書作者包括佔中發起人戴耀廷，有300幾頁，包括同性戀者嘅健康危機、逆向歧視等議題，每本賣75蚊，即係話自由黨都用成幾千蚊送書。