鑫sir憶「花生殼」救華航

【明報專訊】消防處長陳楚鑫（鑫sir）下星期二正式退休前休假，Emily噚日同鑫sir同埋準處長黎文軒茶敘。1977年入職消防處嘅鑫sir，自爆有個花名叫「黑仔」，因為去到邊都有大鑊嘢。1993年，當時駐守啟德機場嘅鑫sir，收到call話華航一架波音747客機發生事故衝落海，當日橫風橫雨，鑫sir跳上車，前面白濛濛一片，初頭連架機位置喺邊都未知。


繩連救生筏 「搭橋」救人

後來鑫sir與同事去到，知道飛機上有超過290人，但成個機場得唔夠30個同事，眼見架飛機載浮載沉，救生滑梯又就嚟甩，情况危急之際，鑫sir「靈機一觸」，叫兩個潛水員將俗稱「花生殼」嘅救生筏用繩連埋，一邊綁喺飛機緊急出口，一邊綁喺岸上消防車，形成兩條「橋」，成功救番唔少人，最後只係有23人受傷。


繼任黎文軒曾處理船民空難

無獨有偶，鑫sir繼任人黎sir於1994年都處理過空難，當時一架香港政府租用作遣返越南船民嘅飛機墜海，造成6死，唔通處理過空難嘅先勝任處長？

話退休後無計劃工作或接受其他公職嘅鑫sir，最想做係揸電單車。原來以前鑫sir考到「學神牌」揸電單車試過畀車撞，搞到佢以後唔敢揸，但佢叫Emily唔好畀佢老婆知喎。