黃錦星堆填公園騷箭技

【明報專訊】堆填區堆完之後會變成點？環境局長黃錦星噚日去咗由堆填區修復而成嘅黃大仙牛池灣公園，睇吓點善用已修復堆填區嘅土地，順便表演近距離射箭，結果箭箭中，但係佢個「三堆一爐」上立法會係咪都咁得心應手就唔知，事關黃錦星自己都好擔心拉布影響撥款進度。


噚日陪住黃錦星行嘅仲有新成立嘅「活化已修復堆填區資助計劃」督導委員會，呢個會負責審議資助非牟利團體喺已修復堆填區興建設施，主席係「公職王」陳智思。


原來2010年起好嘅牛池灣公園，除咗有遊樂場、籃球場等，仲有設施監察堆填氣體濃度同埋沉降情况。Emily一路行都唔覺有臭味，唔講真係唔知個公園曾經係堆填區，而公園亦獲得2010年「亞洲都市景觀獎」。


憂拉布拖慢「三堆一爐」

跟住黃錦星同陳智思去咗公園入面嘅射箭場，喺教練指導下各射兩箭，不過佢哋同個箭靶得幾步距離，咁簡單，當然幾箭都射中啦。


而「三堆一爐」嚟緊要向立會申請撥款，黃錦星射完箭見記者時話，擔心因為新界東北發展前期工程撥款申請嘅拉布，而延遲處理三堆一爐同其他民生相關議案，又話希望議會運作更暢順。