行會列陣批衝立會 林煥光無影

【明報專訊】立法會財委會上周五續議新界東北發展計劃前期撥款時，發生衝擊立法會事件，特首梁振英（CY）噚日開行政會議前主動表示，政府唔會撤回撥款申請。行會開會後，一班成員亦相當配合，列陣批評衝擊行為。不過，早前就免費電視發牌叫過CY「深切檢討」嘅行會召集人林煥光就無現身。Emily聽聞，林煥光噚日其實有去開會，但就無參與列陣，Emily噚日問行會，想知林煥光點睇衝擊事件，但截稿前行會未有回覆。


噚日打頭陣嘅係較少露面、有「亞瑟王」之稱嘅李國章，佢先來一招一石二鳥，批評立法會衝擊行為，話鋒一轉就轉批佔中。


亞瑟王打頭陣 批埋佔中

行會成員平日開會，多數喺停車場進出，罕有行近大堂嘅放滿傳媒咪高峰嘅「咪兜」。但噚日主動同傳媒講嘢嘅除咗李國章，仲有李慧琼、查史美倫、廖長城、林健鋒、周松崗，異口同聲話衝擊立法會大樓事件係有意圖及有組織，又話事件影響香港核心價值，聯合要求立法會檢討。