林新強：共產黨好偉大

【明報專訊】律師會會長林新強前日喺律師會記者招待會上豪言，愛國愛港係每個香港中國公民嘅責任，又話律師會喺呢個立場上，唔會接受任何批評。咁唔知佢愛唔愛中共呢？林新強噚日出席港台節目《中國點點點》時被主持問佢愛唔愛中國共產黨，近期好「紅」嘅林新強開頭有啲扭擰，話呢個問題敏感，佢唔想答。不過，講講吓佢補充話自己覺得共產黨「好偉大」，因為佢哋將國家帶到新紀元。


話共黨「將國家帶到新紀元」

林新強前日喺律師會未決定是否就國務院一國兩制白皮書發聲回應前，擅自表態撐白皮書，又話唔覺得要求法官愛國會損害司法獨立，呢番話喺法律界引起不少迴響。


成員促開會商不信任投票

Emily聽聞，律師會有成員正醞釀集齊50個律師簽名，要求召開會員大會討論事件，包括會否對林新強提出不信任投票咁話。不過，林新強噚日出席節目時，無再就白皮書同律師會成員不滿作出回應。佢話律師會會員9000人，難有一致睇法，又話「我就係代表律師會」，佢一般亦唔會回應個別個案，總之律師會「有聲明就有聲明，無聲明就無聲明」。