渣打香港新總裁 女性員工召集人

【明報專訊】原任渣打（2888）香港區行政總裁嘅洪丕正（Ben），早兩個月升上去做大中華區行政總裁後，香港區CEO呢個位一直懸空。噚日渣打終於宣布新人事任命，新舵手係原任渣打亞洲區副主席嘅陳秀梅（May Tan，圖）。


陳總喺歐洲、亞洲已有30幾年銀行經驗，最初佢係嘉誠亞洲（Cazenove Asia）嘅總裁及合伙人，2009年嘉誠亞洲併入渣打後，佢就轉為擔任渣打證券企業融資環球主管。企業銀行向來係渣打最重要嘅業務，佔收入差不多六成，可見陳總係渣打嘅主將之一。後來佢仲做埋香港董事局成員。


除咗銀行嘅業務外，陳總仲有好多唔同職銜，佢現時係領匯（0823）嘅獨立非執董，2001年至到舊年出任過證監會收購及合併委員會及收購上訴委員會委員。陳總本身亦係倡導董事會性別多元嘅骨幹，佢係渣打香港女性員工網絡召集人，公益事業方面仲有做樂施會副主席，同埋財務及審計委員會成員。