社民連黃浩銘被捕呼冤

【明報專訊】上星期五（13日）部分反對東北規劃嘅示威者衝擊立法會，包括推倒鐵馬、企圖整爛玻璃大門進入立法會，其間社民連內務副主席黃浩銘一度出言阻止，結果被示威者批評之餘，仲被警察拉埋。黃浩銘噚日喺facebook留言，話自己被警方以「非法集結」罪名拘捕時，只係陪一名大學生坐喺立法會內花槽石櫈。


黃浩銘話被捕時幾個警察企圖將他壓低喺地，又一度威嚇佢阻差辦公，結果翌日凌晨4時先被釋放；佢又話自己手上有一條佢被捕經過嘅片段，但就唔方便公開咁話。


稱只出言阻推撞

佢重申，當時因為擔心衝擊立法會玻璃門會被政府作為抹黑同打壓嘅借口，亦唔希望推鐵馬嘅示威者受傷，先至出言阻止，仲話如果阻鐵馬事件令示威者唔高興，願意被人打個肚3拳以泄心頭之憤咁話。