馬刺奪冠 匹克興奮

【明報專訊】正當世界盃打得興起，噚日NBA亦誕生咗總冠軍，馬刺一報舊年之仇贏咗熱火，匹克體育（1968）即刻出嚟領功，皆因馬刺隊嘅東尼柏加就係着住匹克嘅波鞋。小琴見到匹克自詡「在贊助球員方面的獨到眼光」，就諗番起一篇舊聞。話說前幾年林書豪打得出色，全球掀起「林瘋」熱，匹克嘅股價突然飈升，原來傳聞會簽林書豪，後來無咗件事，小琴聽番小道消息，林書豪剛出道時匹克係有接觸過佢，最後都無贊助佢，最後畀「一剔」牌簽咗。


其實外國好多品牌，都會派人去睇學界比賽，發掘未來球星。相反匹克簽嘅全部係已經過咗巔峰嘅球星，當球員出咗名先去搶，自然慢人半拍。小琴唔係話柏加無料到，呢架「法國跑車」唔係浪得虛名，但佢最當打係2000年代，之後一直受傷患困擾，而匹克上年先至簽佢返嚟，佢已經退步咗唔少。


匹克話自己連續6年贊助嘅冠軍隊成員，不過呢批成員唔係二線球員，就係不再當打嘅球星。今年NBA邊件波衫最好賣？係剛失落冠軍嘅勒邦占士。希望匹克他日可以發掘到一啲明日之星，咁先可以證明自己係眼光獨到。


email: piano@mingpao.com

[小琴密語]