政改關注組 忘記父親節

【明報專訊】噚日父親節，難得一年一度「父親大晒」，政界中爸爸有人趕住返香港慶祝，亦有一班老竇唔記得咗父親節，周日照開工。


醫委會上個月審訊遇上母親節，有委員因有母親節節目要押後宣判，不過，民主黨李華明、狄志遠，中原地產創辦人施永青，前新聞統籌專員何安達等噚日就聚首一堂開記招，宣布新成立嘅「香港政改民意關注組」首份政改問卷調查結果，原來佢哋唔記得噚日係父親節。


李華明同Emily講，佢哋一早約好噚日開記招，當時無人記得撞正父親節，而噚日記招後，大家夜晚會同家人慶祝食飯。不過，黨友狄志遠就話，自己都係朝早開facebook時，有朋友祝佢父親節快樂先醒起噚日係父親節。至於施永青睇父親節就更豁達，話呢啲一年一次嘅節目無咩意義，所以唔會特別慶祝。


不過，新民黨田北辰就喺facebook話唔可以錯過一年一度「父親大晒」嘅日子，朝早去完深圳集思營後，就嗱嗱聲經羅湖搭東鐵趕返香港同囡囡食父親節午餐。


莫乃光曬萌照 無變過

至於資訊科技界議員莫乃光，就提前喺上周六同爸爸及家人食飯慶祝，佢噚日上載咗一張童年黑白相賀父親節，原來1歲多嘅光仔，同家個樣係無乜分別嘅，Emily望落莫乃光同爸爸個樣都有七分似。莫乃光話爸爸已80多歲，自己係家中大仔，而由於周六慶祝咗，所以噚日就全日去咗參加爭普選毅行。