黃之鋒話未獲中大取錄

【明報專訊】剛剛考完中學文憑試（DSE）嘅學民思潮成員黃之鋒，仲等緊7月放榜，唔知可唔可以升到大學，但噚日就有報章話佢已收到中大政治與行政學系及社會學系嘅「有條件取錄通知」，佢只要喺HKDSE取得及格或指定嘅成績，就唔使理大學聯招，可以「走捷徑」入中大。呢篇報道就令黃之鋒同政政系老師唔係好滿意。


黃：唔想畀人話有捷徑

黃之鋒同Emily講，篇報道係無中生有，相信係因為6．22選舉前夕，搵議題去炒作抹黑。佢擔心令中大受壓，總之跟足正常程序最緊要，自己入到大學就入到，入唔到都無辦法，唔想畀人話有捷徑，又希望傳媒重視消息真確性。


咁又係，因為黃之鋒搞社運，喺升學制度上唔會得到大學預先收錄，唔似「星之子」陳易希咁，可以因科學成就畀科大破格取錄。


政政系教授指報道無求證

中大政政系副教授周保松就喺facebook講，事件絕對係子虛烏有，全無事實根據，又話該份報章嘅記者從來無就此事向政政系求證。


Emily問過中大公關，根據「大學聯招辦法」，院校唔會與申請人達成任何私人協議。為保障私隱，中大就唔會透露個別申請人嘅情况。