「綠築仔」走可愛風 宣揚綠建築

【明報專訊】環境署去年出咗隻惜食香港運動大使「大嘥鬼」警惕港人惜食，其奇特造型已廣為人知。環境局長黃錦星出任局長前喺香港綠色建築議會做副主席，原來呢個議會都有隻吉祥物宣揚環保信息，叫做「綠築仔」（圖右），外形成棟建築物咁，話要帶領全港建築物達至「綠色建築」，不過造型就有別「大嘥鬼」，走可愛路線。


「綠築仔」除咗仔細到有性別、出生日期同星座外，議會仲幫佢整咗個敵人「紫識嘆」，取其諧音「只識歎」，寓意只顧自己生活舒適而罔顧整個地球環境。


有「紫識嘆」做敵人

綠色建築議會主席黃天祥（圖左）同Emily講，佢哋嚟緊會推行「綠色建築產品標籤認證計劃」，為建築原料銷售同批發商設立認可評審，首階段會喺今年第4季推出，涵蓋家具、瓷磚、油漆同節能燈等15種物料，考慮佢哋喺建築過程中嘅消耗量等。


（余瑋攝）