煮蛙漫畫諷白皮書 Cuson fb被封10小時

【明報專訊】中央政府前日發表《白皮書》講一國兩制後，本港政治漫畫家Cuson Lo隨即畫咗一張諷刺白皮書「溫水煮蛙」漫畫，放上facebook分享。之後佢嘅facebook帳戶無幾耐就被指係虛假用戶而遭封鎖，喺10個鐘之後先獲解封。Cuson同Emily講，被封帳戶已經唔係第一次，過去幾年每逢喺六四、七一等日子前都會有類似事件，不過佢話「愈想我收手就愈要畫」。


「愈想我收手愈要畫」

Cuson嘅facebook帳戶噚晚6點左右獲解封，重見天日後唔少網民立即留言道賀。Cuson則幽默地留言話﹕「我知錯了，以後會密啲更新快樂政治個album了。」Cuson同Emily講，相信有班人監視佢嘅facebook， 一見佢喺敏感時刻發表政治漫畫就檢舉，令到佢嘅帳戶被封。Cuson笑言唔覺得自己有咁大影響力，話幅畫都係得大約1300個like。被問到會唔會喺七一前再畫多幾幅漫畫，佢就話自己畫畫好即興，暫時未有靈感。