議會沒長毛黃國健唔慣

【明報專訊】社民連梁國雄（長毛）喺立法會內動作多多，但因為喺衝擊遞補機制論壇一案被判入獄4星期，須即時服刑，令佢噚日唔可以出席立法會大會，工聯會黃國健笑言自己都可能有同曾鈺成主席咁，有少少「斯德哥爾摩症候群」（人質綜合症，指被害者對於加害者產生情感），因為佢覺得無咗長毛，議會安靜到佢有啲唔習慣。咁無咗長毛呢個對手，有無寂寞、空虛呢？黃國健就話未去到呢個層次。


元秋：噚日冇掛住

至於另外兩個長毛嘅「對手」，工聯會王國興就話肯定唔會有斯德哥爾摩症候群，直言噚日無咗長毛，令佢耳根清靜，點人數鐘聲響少咗好多次，立法會會議亦順暢咗。政壇元秋、民建聯蔣麗芸亦話噚日個會一切正常啲，咁有無掛念長毛呀？蔣麗芸就話「起碼今日（噚日）無」，形容每次長毛開會都會擔心佢唔知又搞啲咩出位嘢，噚日就唔使擔心喇。


噚日朝早人事編制委員會因為無人拉布，順利通過創新及科技局嘅開設公務員職位嘅申請，因為人民力量陳偉業未能加入委員會，其他民主派亦無幫長毛提動議拉布，人力陳志全就喺facebook度話，民主黨唔幫手都預咗，但點解公民黨郭家麒都唔幫手？