中銀小股東 倡管理層薪酬「可加可減」

【明報專訊】中銀香港（2388）噚日開股東會，小股東對於上年派息比率減少好不滿，好幾個股東舉手發問，都要求副董事長兼總裁和廣北減人工，有一位仲提議對管理層薪酬實行「可加可減」機制，同小股東「同舟共濟」。和總聽到呢個建議時，笑笑口答咗句「我聽到了」，即刻轉去下一個提問。


另外有啲中銀香港嘅熟客，趁呢個機會投訴銀行服務不周。有股東話，有日午飯時間去總行辦理參加股東會手續，等咗40分鐘先有職員招呼，又投訴總行地方太大而顯得「冷冰冰」，建議加多部咖啡機喺大堂喎。和總馬上轉向副總裁楊志威、微笑中帶點嚴肅咁話︰「Jason，你聽到了啊？」


楊總立時一臉緊張，回應話完咗股東會後，會好好向員工講一講、加強培訓，仲話咖啡機嘅建議可以考慮。至於總行嘅設計，因為出自貝聿銘大師手筆，可改動嘅空間唔多，但都會盡量「與時並進」喎。


[小琴密語]