七一啟德醞釀又開騷

【明報專訊】舊年七一演藝界喺啟德搞「香港巨蛋音樂節」，被網民話係維穩騷，學民思潮噚日喺facebook仲話音樂節捲土重來；但搞手、演出業協會主席陳淑芬就話，家陣只係喺同一地方批咗個場地，係咪搞得成都未知，「從來無搞過維穩騷，嗰日只係表達訴求嘅日子」。


學民話維穩 附韓星宣傳相

演出業協會之前開過記者會，話香港無乜大場地，促請政府要興建容納到3.5萬人嘅場館。陳淑芬話，今年再搞騷都係表達呢個訴求。不過，網民一直叫呢個騷做維穩騷，學民思潮喺fb叫人緊急廣傳﹕「維穩Show『香港巨蛋音樂節』，今年七一捲土重來，政府打壓行徑十分明顯！」


場地已批 惟仍水浸

學民思潮個呼籲仲連埋香港巨蛋音樂節2014嘅宣傳相，上面有韓星BoA、Super Junior M嘅相，到底佢哋係咪嚟呢？陳淑芬話有聯絡佢哋，個期應該得，但係個場地家浸咗好多水，都未確認搞唔搞到，所以一切根本未落實。到底張相真定假，佢話連佢都唔知。


演出業協會噚晚發聲明，話香港巨蛋音樂節係表達建場館訴求，舊年被誤解為「維穩騷」，佢哋嘅訴求因此被淹沒，協會深表遺憾，但唔會放棄，會繼續用佢哋最擅長方式表達訴求，直至政府落實興建巨型室內場館為止。