葉太引外籍朋友：「戴耀廷話傷港可逼中央」

【明報專訊】建制派齊聲批評佔領中環運動，國務院前日公布有關一國兩制落實嘅《白皮書》，亦被泛民視為打壓佔中手段之一，噚日新民黨主席葉劉淑儀評論白皮書時，亦不忘將白皮書同佔中扯上關係，仲引述商界朋友話，佔中發起人戴耀廷曾經同人講過，佔中係要傷害香港，咁就能逼中央就範喎。


戴：忘記有否講過

葉太話，一國兩制問題，港人都要反省一下，近年刺激、挑釁中央嘅事不時發生，政改亦引來爭論，仲突然話有外籍商界高層出席戴耀廷嘅佔中講座、戴希望向商界籌款時，提到唯一可以逼中央就範嘅方法，就係要傷害香港。佢引述該外籍人士形容戴耀廷係「瘋子」，又話當時無人捐款畀佔中，但究竟該外籍人士屬咩機構，葉太就拒絕透露。


Emily就此事問過戴耀廷，佢就話唔記得自己有無講過呢啲說話，但反駁話，如果簡單抽起人家一句說話來批評人，咁就真係無意思。