馬浚偉揸巴士記親恩

【明報專訊】Emily近日喺YouTube視頻網站，發現人稱「馬仔」嘅藝人馬浚偉穿著九巴車長制服，揸住巴士四圍去，以為佢又有新電視劇推出，原來係九巴邀請馬仔，創作同拍攝一套名為《爸士》嘅音樂微電影。唔講唔知，原來馬仔爸爸係九巴退休車長，服務咗超過30年，主要駕駛來回長沙灣至牛頭角嘅6D號線，養育一家七口，所以呢套微電影都可以話係馬仔嘅父親節禮物。


為九巴拍微電影 父曾是車長

馬仔呢個「冒牌車長」因為無巴士牌，唯有喺沙田車廠取景拍攝，故事係講身為車長嘅馬仔，同電影中妻兒嘅相處。馬仔喺九巴月刊話以前最鍾意坐爸爸揸嘅巴士遊車河，又會幫爸爸拉錢箱，而且當年有家屬證，有免費巴士坐，比起一般人去到更多地方咁話。但唔知佢對於九巴又加價有咩感受呢？