曾鈺成評拉布被彈

【明報專訊】立法會主席曾鈺成近日備受壓力，佢日前公開讚賞拉布議員，即刻被工聯會王國興狠批佢喺建制派傷口撒鹽。


曾主席噚日出席教育學院研討會時，引用王陽明《教條示龍場諸生》中嘅語句，「凡攻我之失者，皆我師也」，表示自己願意留心聽人意見。至於建制派會唔會因為佢嘅說話而受傷害，曾主席就話唔好將事件放得咁大，不點名回贈批評者，話相信佢哋嘅情感唔會咁脆弱喎！


籲各黨派檢討議事規則

曾主席話，佢慣咗被自己人批評，呢次唔係第一次。佢話社會對拉布嘅觀感，大家都知，佢唔係讚賞拉布，只係話拉布議員發言時，內容明顯有做功課，呢個只係「如實觀察」，唔係讚賞喎。不過，曾主席呼籲各黨派認真研究檢討議事規則，因為過去兩次預算案都有人拉布，明年唔知又會點。


六四事件25周年，維園又有集會，記者問曾主席會唔會同中央反映事件，曾主席就話，集會已舉行多年，相信港人嘅訴求，中央都好清楚。