徐立之做科學園董事

【明報專訊】香港大學前校長徐立之4月卸任後，短短兩個月後就有新動向，政府日前公布委任徐教授做科技園董事，為期兩年，7月1日生效。Emily想知徐教授點解做呢個公職，透過電郵話想同佢做訪問，徐教授回覆話，佢一直關心香港科技發展，所以接受政府邀請，仲話政府一直太過急功近利，對科技長遠投資唔夠。


徐教授話，既然政府覺得佢可以喺監管科學園作出貢獻，佢好樂意幫手，不過，由於啱啱先至應承做董事，所以對科學園未來發展未係好清楚，暫時無特別意見。不過，佢批評政府一直唔夠積極，資源投放遠遠不足，未能利用本地學者嘅卓越成就，又急功近利以經濟效益為先，未能建立長期發展優勢咁話。