長毛「偷」文件 民記促行管會跟進

【明報專訊】前幾日立法會保安事務委員會開會，民建聯梁志祥離開時放低咗啲文件，畀社民連梁國雄（長毛）拎咗去仲公開，文件寫明「保安局提供的跟進問題」，令人質疑政府同民建聯打同通，由政府提供問題畀議員問。民建聯葉國謙批評長毛「偷嘢」，表明會去信行政管理委員會，要求跟進事件。


阿謙批評，議員離開咗個位，放文件喺枱，其他人唔應該睇，更加唔應該拎，批評長毛做法有問題。佢話會要求行管會討論，至少諗吓係咪開會時，若有議員已經坐咗一個位，即使該議員有事行開咗一陣，其他人之後都唔應該坐落去。佢又話，事後都有返去鬧吓研究部同事，唔應該咁樣寫文件。


工聯會黃國健認為長毛拎完人嘢仲去投訴，好似細路仔玩泥沙咁，但指梁志祥都有責任，如果係內部文件，一係就隨身拎住走；經民聯林健鋒批評長毛不問自取嘅做法不應該。


文件關公眾利益 湯家驊撐長毛

公民黨湯家驊今次就力撐長毛，話對方做法無問題，因為重要文件唔應該隨處放，若文件關乎公眾利益，好似今次民建聯嘅文件咁，公眾應該要知。長毛強調議員應保管好自己物品，又話自己唔係「偷」，只係拎份文件向局長問責，相信記者執到該份文件都會咁做，而佢最後亦歸還文件，批評民建聯嘅講法好羞恥。