長毛遺囑3點：不自殺唔北上要驗屍

【明報專訊】社民連「長毛」梁國雄接受港台節目In Conversation訪問時，剖白佢作為社運人士同立法會議員嘅感受，當中更透露自己早喺香港回歸後已立定一份遺囑，遺囑上列明3點，包括「第一，我一定不會自殺；第二，我係唔會返大陸，如果有人發現長毛喺大陸被捕，呢個一定係假；第三，我死咗之後一定要驗屍」。


母親做家傭 支持共產黨

長毛話，母親當年支持共產黨，母親由內地嚟到香港做家傭，覺得自己身分好卑微，所以當毛澤東喺內地高呼「中國人民站起來」時，母親相信共產黨有所作為。長毛曾幾何時都係「毛派」一分子，但長毛話相信任何權力都有腐朽嘅可能，好快佢就捨棄「毛派」，追隨馬克思主義者托洛斯基同哲古華拉，因為兩人理念都係不信任權力，「真正嘅民主係擔當起監察嘅角色，我哋唔可以只依靠領導者」。


長毛又喺節目分享童年經歷，話由於母親做家傭，佢自己經常寄人籬下住親戚屋企，親戚有7個細路，佢經常做代罪羔羊；亦因為咁佢鍾意睇書，愈睇愈多，因為喺書嘅世界裏面無人會打擾佢，「只有你會背叛手中嘅書，而佢唔會捨你而去」。