朱牧暑天日行40分鐘

【明報專訊】今日係六四25周年，支聯會今晚喺維園舉行燭光晚會，過咗今日，佔中三子之一嘅朱耀明牧師同泛民就會將焦點放喺「6•22」全民投票。雖然近期天氣好熱，但朱牧話要做好準備，所以佢日日步行40分鐘，以配合樞機稍後參加嘅「18區毅行活動」。


為毅行打底

早前天主教香港教區榮休主教陳日君樞機宣布參加毅行活動，仿效甘地「食鹽行軍」公民抗命。朱牧同Emily講，佢未知毅行活動詳情，不過，佢為免到時應付唔嚟，呢排開始鍛煉體魄，日日由柴灣地鐵站行去小西灣，大約40分鐘啦。


佔中三子之一嘅陳健民話，三子將參與毅行呢場重頭戲，但佢話非常擔心，因為一般人行十幾個鐘都已經好辛苦，何况要82歲嘅陳日君、70歲嘅朱耀明兩位老人家？若天氣太熱、有人中暑，都唔知點算好，佢笑言最好落場雨，等大家無咁熱就好喇。