巧合？港滬都有熊貓展

【明報專訊】宣揚環保理念嘅1600隻紙熊貓巡迴展覽（上圖，模擬圖片），正當密鑼緊鼓準備下星期一喺香港開鑼之際，有網民話喺網上驚現「山寨版」咁話。一個名為「1st Panda」展覽早兩日喺上海舉行（下圖，網上圖片），聲稱會巡迴內地32個城市，展出100隻用毛竹碎料製嘅大熊貓模型，又係宣揚保育信息，有無咁巧合？


世界自然基金會香港分會（WWF）噚日同本港策展單位AllRightsReserved發出聯合聲明，話紙熊貓展覽知識產權，係由WWF同創作人法國藝術家Paulo Grangeon共同擁有，AllRightReserved係紙熊貓展覽喺「香港同內地唯一得到授權的策展機構」，未經授權展覽係肆意侵權，一經發現，將保留追究法律責任權利。


香港展方：未授權 保留追究權利

Emily聽講上海個展覽係喺無知會WWF之下舉行，喺香港就暫時未有侵權情况。AllRightsReserved創作總監林樹鑫（SK）話，大家有心舉行展覽做慈善係好事，但如果出現誤導，搞到公眾以為上海同香港展覽都係同一樣嘢就唔係幾好，仲話「你買iPhone，都唔可以當佢係Android機啦」。