警察撲水救火 網民讚好

【明報專訊】近年警隊形象麻麻，但前日九龍灣啟晴邨槍殺案中，一班高大威猛嘅飛虎精英出動，著起全套裝備圍剿槍客，令警隊攞番唔少形象分。而噚日喺酷熱天氣警告下，有讀者拍低兩個巡警撲水救火（圖），相片喺網上公開後，過千網民畀like，留言大讚﹕「Good job！」


影相嘅讀者同Emily講，噚日下午1點幾行經土瓜灣北帝街與新山道交界，見到垃圾桶冒煙起火，有兩個年輕巡警率先到場，立即除低警帽衝去附近餐廳借桶借水，來回多次接力潑水救火，最終喺消防員到場前將火救熄，兩個阿sir流汗流到制服都濕埋，可見十分落力。


雖然呢單唔係大case，但讀者認為警員表現專業，令佢好感動，於是行埋去將佢哋兩個編號抄低，將相片放上網，留言話﹕「兩位年青的警員﹕PC12806、PC13966，辛苦晒您們！」網民就回應﹕「這就是香港警察應有的質素！」