LEGO重演飛虎駁火

【明報專訊】前日啟晴邨槍殺自殺案，飛虎隊大舉出動，有電視台全程直播，仲影到兩個飛虎隊員喺大廈外牆游繩，事件全城關注，即日網上就出現由LEGO（樂高積木）砌成嘅飛虎隊公仔企喺外牆圖片，後來更有飛虎隊員連同飛虎狗出現嘅「場面」，被唔少網民瘋傳。原來呢一系列作品，係LEGO發燒友Antony一邊睇直播、一邊用手上組件砌出嚟嘅。


Antony係軍事積木店嘅負責人，佢同Emily講，睇住電視機直播時都好緊張，由於當時手上有組件，於是隨手就將飛虎隊企喺外牆等候入屋嘅情境砌出嚟，然後放上網分享，好開心網民都鍾意。


店長：飛虎出場興奮

Antony話飛虎隊組件一向特別好賣，警察主題嘅組件亦有好多捧場客，而啟晴邨案件發生後，多咗好多客人查問，但銷情暫未有特別增長。對於警方前日嘅行動，Antony認為已經做得好好，因為除犯人之外冇人傷亡。飛虎隊出場就令佢好興奮，因為諗起好多年前嘅荃灣中心槍戰案。


其實荃灣中心案件發生喺1992年，當時飛虎隊出動圍捕持械匪幫，當強攻入廣州樓23樓單位時，同匪徒爆發槍戰，最後6個悍匪全部被捕。