吳克儉端午唔答問題

【明報專訊】唔少高官噚日端午節都要出席活動，教育局長吳克儉就去咗大澳參與由大澳傳統龍舟協會主辦嘅「端午龍舟遊涌」，仲上咗街渡一齊巡遊水道，心情靚靚嘅佢企喺船頭向岸上遊人同街坊揮手打招呼（圖），Emily同行家喺緊隨其後嘅街渡大叫局長，佢都微笑轉頭畀大家影番幾張靚相，表現好似幾親切。


之不過，當大家一問佢正經事，吳克儉就耍手擰頭。佢喺開幕禮坐足全程，離開時記者多番追問佢有關早前教育局批准康樂園幼稚園違規收取2800元報名費一事，但吳克儉無答，最後新聞官就話「局長今日唔答問題」。


（葉家豪攝）