林鄭談育兒 不打仔 無外傭

【明報專訊】今日端午節，中華總商會同「築福香港」噚日先喺會展「大排筵席」，邀請超過300個基層市民一齊食自助午餐，署理行政長官林鄭月娥亦有出席，仲同在座市民特別係父母大談湊仔經。


身為兩個兒子媽媽嘅林太話，父母同仔女相處時，應該採互相尊重同埋當佢哋係朋友兩種態度之間，要拿揑得宜，雙方都應該設身處地了解大家想法，咁就可以和諧共處。佢以自己做例子，話一直以尊重嘅態度同兩個仔相處，仲話自己從來唔會出手打仔，並堅持親自照顧，唔會請外傭。


引政改宣傳講家庭共融

林鄭仲引用呢排政改諮詢成日講嗰句，話要達至家庭共融，重點在於「一齊講、一齊聽、有商有量」，仲話如果父母可以更多從仔女嘅角度出發，仔女會更享受同家人相處嘅時光。不過，呢排林鄭工務繁多，兩個仔家喺英國住，擔唔擔心影響同兒子嘅關係？林鄭就話距離並唔係阻礙溝通嘅因素，認為家長要花多啲時間，關心仔女唔同階段嘅需要。