曾德成由巴西講到反賭波

【明報專訊】世界盃6月12日開鑼，民政事務局長曾德成就話，今屆唔少朋友看好主辦國巴西，一來巴西曾經五次贏得冠軍，而且有個說法，謂根據經驗，凡在南美洲舉辦嘅世界盃足球賽，都係由南美國家得勝。不過，佢同時好穩陣咁話「波是圓的」，未到最後也不知鹿死誰手喎，又指1950年都係巴西主辦世界盃足球賽，但喺總決賽以2比1敗給烏拉圭，只攞到亞軍。


德成局長係咪球迷，Emily就唔清楚，而局長喺網誌論足球，無非都係想提醒大家睇波唔賭波。佢話世界盃全球矚目，表揚體育精神及宣傳種族共融，但同時掀起賭風，指不法賭波集團用盡方法經營，吸引人下注。


德成局長話，當局會透過《警訊》節目、電子及印刷媒體以及互聯網宣傳沉迷賭博嘅禍害信息。世界盃舉行期間，獲平和基金資助嘅4個治療及輔導中心，會針對性加強推廣及治療輔導服務，特別係求助熱線電話（1834 633）。