李慧琼睇大事件入鏡

【明報專訊】噚日最多人講嘅新聞，相信係警方派出飛虎隊到啟晴邨圍剿槍殺案疑犯，由於圍剿過程全程有直播，唔少人都話睇得肉緊、驚心動魄。Emily同事當然有到現場採訪，仲見到行會成員兼立法會議員李慧琼（Starry）都有到現場，當電視新聞直播東九龍總區警司周衍鴻講案情時，見到Starry都同記者一樣行埋去聽，仲好似聽得好肉緊投入。


Emily事後問起Starry，佢話因為今次槍擊案「咁大件事」，亦知道有黨友同事到咗現場了解，所以咪去現場睇睇，啱啱撞正警方案件主管講解案件，咪行埋去聽吓，點知就被攝入鏡頭。Starry話其實過去大型事件如花園街大火都有到場了解，只係傳媒未有留意到啫。


梁美芬「西九」跨區關注

呢宗發生喺東九龍嘅案件，都引起「西九新動力」跨區關注，噚晚就發新聞稿話立法會議員梁美芬、西九新動力嘅區議員會到金鐘警察總部「請願」，話案件嚴重引發居民擔心區內治安咁話。


另一邊廂，民主黨嘅涂謹申就被整蠱，佢喺區內橫額被改咗內容，變成「強烈譴責警方出動飛虎隊，令犯人受驚作出自殺行為」，搞到阿涂要出聲明，話相片全屬被人惡搞之作，特此澄清。