港酒店貴絕亞太區

【明報專訊】全球最貴嘅酒店喺邊度？彭博最近有個統計，就話全球平均酒店房價最貴係瑞士日內瓦，每晚要308美元（約2388港元），比酒店出名貴嘅紐約仲要貴三成。分析話因為好多國際組織，好似聯合國、世界衛生組織都喺日內瓦，推高咗酒店價。迪拜就排名第二。


全球排名第6

香港不僅樓貴，酒店房租一樣貴絕亞太地區，全球排名第6，每晚要242美元（約1876港元），高過倫敦、紐約、新加坡。新加坡就係亞太第二貴嘅地方。出乎意料嘅係，紐約酒店價錢僅僅排名全球第10，仲唔係美國最貴嘅地方。原來美國最貴係度假勝地邁阿密。彭博分析就話，酒店貴嘅地方通常都有地少、客戶層富裕呢啲共通點。


咁邊度最平呢？彭博統計咗106個世界主要城市，話最平係越南河內，每晚只要62美金（約481港元），比日內瓦平足足七成多。唔知個調查會唔會吸引多點遊客去越南旅遊呢？


[小琴密語]