田二少挑戰一分鐘如廁

【明報專訊】立法會預算案撥款拉布戰噚日繼續審議，主席曾鈺成預計下周立法會大會可進入三讀。噚日早上甫復會，就因為唔夠議員出席要點人數，有建制派議員投訴泛民議員唔出席會議，新民黨田北辰請主席要求泛民議員多啲返嚟，「因為我哋好辛苦呀﹗」究竟田二少有咩咁辛苦？原來年過60歲嘅佢，喺拉布期間去廁所都要分兩次。


話說喺星期四晚，建制派議員已對泛民議員唔留喺會議廳好火滾。二少喺facebook投訴，話泛民成日唔留喺會議廳，搞到佢一旦人有三急，要喺一分鐘表決鐘聲時限內，走去最近嘅洗手間解決。加埋洗手，對於年過60歲嘅佢嚟講，可謂mission impossible！


嫻姐著裙行快啲

專登為拉布著裙，諗住可以行快啲嘅工聯會榮譽會長陳婉嫻都話，對於女議員嚟講，得一分鐘真係唔夠時間去廁所。