支聯6常委被黑客轟炸

【明報專訊】今年六四25周年，支聯會噚日公布燭光晚會同周日大遊行安排，呢排好唔得閒嘅李卓人（阿人）話，由上個月26號六四紀念館開幕以來，已經累積接受咗超過40間外國傳媒訪問，最高峰嗰日連踩8個，忙到無氣唞；不過阿人同Emily講，海外傳媒仍然咁關注六四，係證明大家並無忘記呢件事。


阿人仲話，上個禮拜開始，6個支聯會常委包括佢自己、蔡耀昌、何俊仁等等，分別收到好多黑客垃圾電郵，平均每人每日收三四百封，好似上個星期五、六咁，佢哋都收到過千封。


阿人覺得今年電郵被黑客攻擊比舊年嚴重，認為有人為咗打擊支聯會無所不用其極，唯有遲啲搵資訊科技界議員Charles（莫乃光）幫手，睇吓點樣堵截喇。