翟少：仁龍做特首 我或做司長

【明報專訊】監警會主席翟紹唐任期本月結束，之前曾熱傳梁振英上任做特首、「翟少」會做律政司長，噚日Emily同佢做告別訪問時追問佢會唔會做律政司長，翟少講笑話「嚟緊嗰兩年唔會做」，仲語出驚人，話如果前律政司長黃仁龍做特首，佢可能會做律政司長，唔通翟少泄露天機？佢就叫大家去問黃仁龍。至於點解呢屆喺政府有官佢都唔肯做，佢就話家政治環境要做到嘢好困難，「入咗廚房就熱得滯，我怕熱，所以唔係幾好」。


同警隊關係好 一哥約食飯

翟少任內積極改善同警隊關係，上星期「一哥」曾偉雄、兩個「二哥」盧偉聰同馬維騄、監管處處長劉業成仲請咗翟少同各夫人去警察總部嘅高級警官會所晚餐，翟少笑言係「最高榮譽」。一哥攞咗啲香港買唔到嘅私伙茶葉冲茶請翟少品嘗，至於係咩茶翟少就賣關子。


卸任專心湊女睇波

噚日翟少主持任內最後一次會議，警方、監警會委員同傳媒爭住送紀念品，佢收嘢收到手軟，劉業成仲「憑歌寄意」，送咗首You Raise Me Up畀翟少，讚揚佢帶領監警會提升警隊服務質素。翟少就話以前唔易同人相處，做咗主席改善咗溝通技巧，而卸任後可以多啲時間湊女、打網球同睇世界盃，自己會捧德國隊。