高達斌挑機 六四擺街站

【明報專訊】八九民運時，公民黨毛孟靜（Miss Mo）仲做緊記者，六四事件後，Miss Mo花咗幾個月寫咗本關於六四嘅小說《危城記》，講述兩個記者同一個社工嘅故事。25年後，Miss Mo就喺舊書基礎下加入新元素，出版新書《戀我危城》，講吓呢個故事中3個主人翁25年後發生咩事，當中亦有加入《明報》前總編輯劉進圖被斬、反國教科事件等元素。


高播錄像 話廣場內無人死

另一邊廂，愛港之聲主席高達斌又有嘢講，佢話當年天安門廣場內無人死，仲擺明向支聯會挑機，話將於6月4日喺維園近港鐵天后站設街站，播放佢哋剪輯嘅錄像片段，希望市民「認清六四真相」。高達斌話，當年解放軍係維護國家安全，並非屠殺或殘害人民。佢又話學生當年係和平與緩慢離開廣場，而死傷者都係喺廣場外喎。


Miss Mo再出書，原來係次文化堂社長彭志銘上年喺特賣場買咗《危城記》呢本舊書，睇完覺得可以趁六四25周年再出版，延續故事。


Miss Mo唔講係咪真人真事

書中內容係咪真實事件？Miss Mo強調係小說，但係基於佢對事件有深切感受而寫成，有生活影子，當中亦有愛情故事，提到有民運分子喺香港滯留時，就有女記者同民運人士發生戀情，但究竟係咪真有其事，Miss Mo就唔肯講喇。呢本書印2000本，彭志銘話，如果再過多25年仲要Miss Mo出書補充六四感覺，相信會係香港人嘅悲哀！