迷你天宮一號登陸香港

【明報專訊】小朋友想做醫生、律師同飛機師等就成日聽，想做工程師嘅可能比較少，工程師學會為咗提升小童對工程嘅興趣，將會喺6月8日（星期日）舉行「創意嘉年華」，特別同中央政府借來天宮一號、神舟飛船、嫦娥三號着陸器及蛟龍號4款國家級科技產品——嘅模型展出，最大嘅神舟飛船模型長達兩米，仲有遙控模型車比賽等，教育小孩工程學知識。


工程師學會副會長蔡健鴻（左）話，受展覽場地升降機容量所限，今次只能展覽最多長兩米嘅模型，不過能夠有4款國家主要科技產品模型展出，機會已經非常難得。港鐵亦都借出隧道鑽挖機模型展出，相信今次唔會畀雨水浸壞嘞。


隨咗睇模型，入場嘅朋友仲可以親手砌模型車。活動喺6月8日早上9時至下午5時，於九龍灣國際展貿中心3樓Star Hall舉行，免費入場。


圖為工程師學會會長陳健碩（右）及副會長蔡健鴻噚日為活動舉行揭幕禮。